កាសែតមនសិការខ្មែរ ត្រូវបានបង្កើតឡើងនៅឆ្នាំ១៩៩៤ ដោយសកម្មជននយោបាយគណបក្សប្រឆាំង គឺលោក ដាំ សិដ្ឋ ដែលជាអ្នកគាំទ្រគណបក្សសមរង្ស៊ី។ ក្នុងឆ្នាំ១៩៩៨ ក្រសួងព័ត៌មានបានប្រកាសឲ្យរោងពុម្ពឯកជន បញ្ឈប់ការបោះពុម្ពកាសែតមួយនេះ ដោយយោងថា លោកមិនមានច្បាប់អនុញ្ញាតក្នុងការបោះពុម្ព បន្ទាប់ពីរដ្ឋប្រហារឆ្នាំ១៩៩៧ ទម្លាក់ទ្រង់រណឫទ្ធិ។ ក្នុងឆ្នាំ២០០៨ កាសែតនេះបានប្រឈមមុខនឹងពាក្យបណ្ដឹងចំនួន ១៨ករណី របស់រដ្ឋាភិបាល ពីបទបង្ខូចកេរ្តិ៍ឈ្មោះ បទផ្សាយព័ត៌មានមិនពិត និងបទរំលោភសិទ្ធិឯកជន។ វាបានបណ្តាលឲ្យមានហានិភ័យ ដល់ការផ្សាយរបស់កាសែតនេះ បន្ទាប់ពីនិពន្ធនាយក លោក ដាំ សិដ្ឋ ផ្ញើលិខិតសុំទោសទៅកាន់លោកនាយករដ្ឋមន្រ្តី ហ៊ុន សែន នៅថ្ងៃទី៨ ខែកក្កដា ឆ្នាំ២០០៩ ដោយសន្យាបញ្ឈប់ការបោះពុម្ពកាសែត ដើម្បីគេចផុតពីការប្ដឹងផ្ដល់។ កាសែតនេះ ត្រូវបានបោះពុម្ពផ្សាយឡើងវិញ ក្នុងឆ្នាំ២០១០ ហើយបានរងការគំរាមគំហែង និងរងការប្ដឹងម្តងទៀត បន្ទាប់ពីការចុះផ្សាយចោទប្រកាន់លោកនាយករដ្ឋមន្រ្តី ហ៊ុន សែន ថាបានប្រើកងកម្លាំងយោធាខុសច្បាប់ ក្នុងការរកសំឡេងឆ្នោត ក្នុងការបោះឆ្នោតជាតិឆ្នាំ២០១៣។

កាសែតមនសិការខ្មែរ ក៏ជាស្ថាប័នកាសែតរបស់អ្នកយកព័ត៌មានសកម្មម្នាក់ គឺលោក ខឹម សំបូរ ដែលលោកបានធ្វើការនៅកាសែតនេះ ពីឆ្នាំ១៩៩៧ ដល់ឆ្នាំ២០០៨ មុនពេលលោកត្រូវបានបាញ់សម្លាប់ជាមួយកូនប្រុស បន្ទាប់ពីកាសែតនេះបានផ្សាយអត្ថបទរិះគន់បញ្ហាពុករលួយ។