ទូរទស្សន៍ម៉ាយធីវី ជាប៉ុស្តិ៍ទូរទស្សន៍ផ្សាយជាភាសាជាតិពីទីក្រុងភ្នំពេញ ទៅកាន់ភាគខាងលិចនៃប្រទេសកម្ពុជា។ វាជាទូរទស្សន៍ផ្សាយមិនគិតថ្លៃសេវា និងគិតសេវាបើមើលតាមប៉ុស្តិ៍ផ្កាយរណប។

ទូរទស្សន៍ម៉ាយធីវីត្រូវបានសម្ពោធការផ្សាយនៅខែមករា ឆ្នាំ២០០៨ ដោយក្រុមហ៊ុនស៊ីប៊ីអេស ដែលជាសមាជិកគ្រួសារថ្មីជាមួយទូរទស្សន៍ស៊ីធីអិន។ វាផ្តោតសំខាន់លើជំនាន់យុវវ័យដែលប្រើទូរស័ព្ទស្មាតហ្វូន ពោលគឺអ្នកមានអាយុក្រោម២៥ឆ្នាំ។

ម៉ាយធីវីជាទូរទស្សន៍ដ៏មានប្រជាប្រិយភាពក្នុងចំណោមយុវជនកម្ពុជា។ ទូរទស្សន៍នេះបានផ្តល់ឲ្យទស្សនិកជននូវកម្មវិធីក្នុងស្រុកដែលមានភាពច្នៃប្រឌិត និងកម្មវិធីអន្តរជាតិផងដែរ។ កម្មវិធីដែលមានការពេញនិយមជាងគេនោះគឺកម្មវីធីពេញចិត្ត ឬអត់ ដែលចូលរួមសម្តែងដោយបេក្ខជន និងធ្វើការកាត់សេចក្តីពីគណៈកម្មការដែលជាអ្នកសិល្បៈកម្ពុជា។ទូរទស្សន៍ម៉ាយធីវីក៏មានសម្ទុះលើកម្មវីធីកម្សាន្ត ដូចជាភាពយន្តភាគ និងការប្រគំតន្រ្តី។ទូរទស្សន៍នេះផ្តោតសំខាន់លើកម្មវីធីកម្សាន្ត ហើយបានប្តេជ្ញាផលិតកម្មវិធីដោយខ្លួនឯងយ៉ាងហោចណាស់៥០%លើកម្មវិធីផ្សាយ។ កម្មវិធីទូរទស្សន៍នេះក៏មានលើគេហទំព័រអុីនធឺណេត និងក្នុងកម្មវិធីទូរស័ព្ទស្មាតហ្វូន។ ៧០%នៃកម្មវិធីជាកម្មវីធីតន្រ្តី និងការផ្សាយផ្ទាល់ ដើម្បីលើកកម្ពស់ស្នាដៃនិងការកម្សាន្តក្នុងស្រុក ដែលផ្តោតទៅលើគោលការណ៏ក្នុងការអភិវឌ្ឍ និងអប់រំយុវជន។

ម៉ាយធីវីផ្សាយចាប់ពីម៉ោង៦ព្រឹកដល់ម៉ោង១២យប់ជារៀងរាល់ថ្ងៃ។ នាពេលបច្ចុប្បន្នទូរទស្សន៍នេះជាទូរទស្សន៍ដែលមានប្រជាប្រិយភាពក្នុងចំណោមយុវវ័យកម្ពុជា ដូចជាទូរទស្សន៍ស៊ីធីអិន និងទូរទស្សន៍បាយ័នផងដែរ [BBC Media Action, ២០១៤, p.៩]។