មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM)

មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) គឺជាស្ថាប័នដែលដំណើរការវិទ្យុវីអូឌី។ CCIM ត្រូវបានបង្កើតឡើងនៅរាជធានី ភ្នំពេញ ក្នុងឆ្នាំ២០០៧ ហើយត្រូវបានចុះបញ្ជីជាមួយក្រសួងមហាផ្ទៃជាអង្គការក្រៅរដ្ឋាភិបាល។

បេសកកម្មរបស់ CCIM គឺដើម្បីលើកកម្ពស់ អភិបាលកិច្ច តាម បែបប្រជាធិបតេយ្យ និងការអនុវត្តសិទ្ធិមនុស្សនៅ ក្នុងប្រទេសកម្ពុជា តាមរយៈការអភិវឌ្ឍប្រព័ន្ធផ្សព្វផ្សាយបែបចំរុះនិងឯករាជ្យ។ CCIM ដឹកនាំ ដោយ លោក ប៉ាង ងួនទៀង ដែលជាអតីតអនុប្រធានមជ្ឈមណ្ឌលសិទ្ធិមនុស្សកម្ពុជា។

CCIM បានដាក់ពាក្យសុំអាជ្ញាប័ណ្ណទៅក្រសួងព័ត៌មាន ដើម្បីដំណើរការវិទ្យុវីអូឌីហើយមិនដែលត្រូវបានផ្តល់ឱ្យ។ ជាលទ្ធផល CCIM បានចាប់ផ្តើមដំណើរការវិទ្យុ ដែលមានស្រាប់នៅសៀមរាប និង វិទ្យុសារីកា នៅចុងបញ្ចប់នៃត្រីមាសទី១ ក្នុងឆ្នាំ២០០៩។ នៅដំណាច់ឆ្នាំនោះ វិទ្យុសារីកា (Sarika FM) មានវិសាលភាព គ្របដណ្តប់នៃខេត្តចំនួន១៤ ក្នុងចំណោម២៥ខេត្តក្រុង ដែលអាចស្រូបយកអ្នកស្តាប់បានប្រមាណ ៨លាន៥សែននាក់ ក្នុងចំណោមប្រជាជន១៤លាននាក់។

ចាប់តាំងពីឆ្នាំ២០១១ CCIM បានបង្កើតវិធីសាស្ត្រជាប្រព័ន្ធផ្សព្វផ្សាយបែបចម្រុះ ដើម្បីផលិតនិងផ្សព្វផ្សាយមាតិការបស់ខ្លួនតាមរយៈវីអូឌី និង វិទ្យុសារិកា ហើយ CCIM បានបង្កើតគេហទំព័រព័ត៌មានវីអូឌី (www.vodhotnews.com) សម្រាប់ការផលិតនិងផ្សព្វផ្សាយនៅលើអ៊ីនធឺណែត និងរួមាន ការផលិតកម្មទូរទស្សន៍និងវីដេអូ ជាដើម។

CCIM ចាត់ទុកថា ការអភិវឌ្ឍន៍ប្រព័ន្ធផ្សព្វផ្សាយដើរតួនាទីយ៉ាងសំខាន់ ក្នុងការលើកកម្ពស់អភិបាលកិច្ចតាមបែបប្រជាធិបតេយ្យ និងការពង្រឹងសិទ្ធិមនុស្សនៅកម្ពុជា។