មជ្ឈមណ្ឌលព័ត៌មាន​នគរ​វត្ត​

មជ្ឈមណ្ឌលព័ត៌មាននគរវត្ត ត្រូវបានបង្កើតឡើងនៅខែកក្កដា ឆ្នាំ២០១០ ដោយលោកស្រី សៀង ចាន់ហេង ដែលជានាយកក្រុមហ៊ុនហេងអភិវឌ្ឍន៍ និងជាអតីតអ្នកផ្តល់ហិរញ្ញវត្ថុ ដល់មជ្ឈមណ្ឌលព័ត៌មានដើមអម្ពិល របស់លោក សយ សុភាព។

លោកស្រី សៀង ចាន់ហេង បានចាត់តាំងកូនស្រីរបស់គាត់ ឈ្មោះ ឌឹម សុភាវី ជានិពន្ធនាយក​នៃ​មជ្ឈមណ្ឌល​ព័ត៌មាននគរវត្ត។ កាលពីមុន លោកស្រី ឌឹម សុភាវី គឺជានាយករងនៃមជ្ឈមណ្ឌលព័ត៌មានដើមអម្ពិល។រដ្ឋមន្រ្តីក្រសួងព័ត៌មាន លោក ខៀវ កាញ៉ារីទ្ធ បានមាន​ប្រសាសន៍​ថា លោកនាយករដ្ឋមន្រ្តី ហ៊ុន សែន បានស្នើឱ្យក្រសួងលោក ជួយគាំទ្រដល់មជ្ឈមណ្ឌលព័ត៌មាននគរវត្ត នៅពេលដែលវាចាប់ផ្តើមដំណើរការ។

នៅខែសីហា ឆ្នាំ២០១១ មជ្ឈមណ្ឌលនេះបានសម្ពោធរោងពុម្ពរបស់ខ្លួន ឈ្មោះក្រុងនរាយ៍។ នៅពេលនោះ លោក ទូច គង្គា ដែលជាជំនួយការម្នាក់របស់នាយឧត្តមសេនីយ៍ គន់ គីម អគ្គមេបញ្ជាការរងនៃកងយោធពលខេមរភូមិន្ទ ត្រូវបានរាយការណ៍ ថាជានាយកនៃមជ្ឈមណ្ឌលនេះ។ ភរិយារបស់លោកគន់ គីម ឈ្មោះ កែកុល សោភា គឺជានាយករង។

លោកស្រី កែកុល សោភា ពេលនេះគឺជានាយកនៃមជ្ឈមណ្ឌលព័ត៌មាន​នគរ​វត្ត​ និងជាអ្នកកាន់អាជ្ញាប័ណ្ណ នៃក្រុមហ៊ុនប្រព័ន្ធផ្សព្វផ្សាយរបស់មជ្ឈមណ្ឌលនេះ។ បច្ចុប្បន្ន នគរវត្តដំណើរការកាសែតប្រចាំថ្ងៃ ឈ្មោះកាសែតនគរវត្ត និងទស្សនាវដ្ដីប្រចាំខែ ព្រមទាំងព័ត៌មានតាមអុីនធឺណិត។